A servuccia prienziosa - La mauvaise servante paresseuse

Texte de Jean Costa - Testu di Ghjuvanni Costa

Quellu vechju curatu d'Algajola chè vo cunniscite postu chì l'avete vistu sparte un casgiu niulincu cù Santu u circandaghju, avìa una servuccia di circa vint'anni, mezana 1 d'una famiglia di pòveri disgraziati è ch'ellu tenìa per cumpassione. Era una zitelletta belluccia ma, per è faccende casane pocu laziosa 2 à tal puntu ch'in presbiteriu e ragnate 3 éranu cume in casa soia è chì un zingarellu * di lamaghja 4 in fondu à l'àbitu 5 di u nostru prete andava alegrèndusi 6 perchè e zarziture 7 o altre cusgere 8 ùn avìanu mai avutu a simpatìa di e maniole di Marietta. Cusì si chjamava a serva di "Missié".
Una dumènica a mane questu quì, invitatu dopu messa à fà cullazione inde u merre, chere 9 à Marietta u paghju di scarpi novi ch'ellu ùn pone per risparu 10 chè una volta a simana. Carchi di fanga secca 11 ch'elli éranu ssi scarpi ! È chì fanga ! Quella chì, sette ghjorni fà, ci avìa appiccicatu 12 una dumènica piuvicinosa.
"O Mariè ! Ùn l'ai anc'à nettà ssi scarpi ! " si lamenta u nostru brav'omu, pruvendu d'ingrussà a voce.
"Chì bisognu c'era di nettàlli o sgiò curà ? Tantu in escendu l'avete da imbruttà torna", risponde ssa scrianzata prienzosa 13.

A ssi detti l'omu di Dìu si sente quasi scappà u tappu 1 è, in punta, di u pede dirittu, li si pare d'avè un furmiculaghju 2 di cuderzule 3. Ma u Signore u ritene à tempu, è li face ancu ingolle 4 a ghjastemuccia chì, sempre prontu in tale circunstanze, un diavulottu l'avìa messu sott'à a lingua.
"Ai ancu ragiò ", cunvene dunque. È, dopu prontu, si ne và à dì a so messa. Ma strada facendu si dice in pettu 5 : "Aspetta à ùn vultà, o Marietta meia, chì m'ai da cascà".
Dopu avè manghjatu è betu, ùn vede l'ora u sgiò curatu di ghjunghje in presbiteriu, è stinza 6 u passu per sse strette. Un'arrechja li fisca : hè segnu chì u Supranu l'hà da parlà. Cù u ditu mìgnulu a si stappa 7 è : "Chì ci hè torna o Signore ?" dice, quasi stizzosu 8, dubitèndusi 9 di ciò chì ghjustamente ci hè.

"A socu 1 à ciò chè tù pensi " risponde a voce suprana. "Lascia corre u me figliolu. È sì t'aghju anzora 2 lagatu fà quandu t'escisti 3 di casa, ùn ne fà micca una funa è ùn piglià troppu piacè à i sèguiti, chì sarìa per tè peccatu maiò ". Ma u nostru curatu, infiacculatu 4 da u vinu generosu di u sgiò merre, si tappa 5 l'arrechje à dui mani.
"Entrìtemi in borsa o Signore ! Sta volta Marietta l'hà da sente, a lezzione ! Dopu faraghju penitenza sì vo vulete. " È ghjustu vede a serva chì stà aspittendu nant'à l'usciu, appughjata à u tilare 6. À l'aria pare bella scuntentìssima. È d'in fatti :
"O sgiò curatu, voi po sì chì e fate belle ! Vi ne site andatu cù a chjave di a cridenza 7 è ùn m'avete lagatu nunda per manghjà à meziornu. "
"T'aspettava custì " pensa u nostru sacerdore. È à alta voce : "Manghjà ? È chì bisognu di manghjà à meziornu n'avìa o cararella di mè, postu chì sta sera, à ora di cena, averisti avutu torna a fame ? " . È dinò in pettu : "O Signore, chì ne dite di què ? Ava, sì vo vulete sò prontu à favvi l'attu di cuntrizzione."