U sgiò vescu di San Fiurè 1 - L'évêque de Saint-Florent

Texte de Jean Costa - Testu di Ghjuvanni Costa

Nu i tempi, i veschi andàvanu à cavallu. Ma c'èranu ancu i puvarecci chì qualchi volta a si pigliàvanu ancu à pedi, da un paese à l'altru di u so vescuvatu 2.
Quellu di San Fiurè fece dunque insillà a so mula è andò, una mane, à vede un so curatu 3 di u vicinaghju, è rèndesi contu da sè stessu unde 4 ne èranu i travaglii di a nova ghjesgia 5. Cuntava di vultà in San Fiurè inde a seratina, ma dopu meziornu si messe u tempurale è a sette ore di sera ne falava sempre à fiocchi 6.
Dopu cena fece una stanciatella 7, ma u curatu ùn volse lascià parte u so vescu c'ùn tempu sìmule, è li prupunì 8 d'accettà senza cerimonie u so lettu, chì ellu, più giòvanu, averìa durmitu i pedi à u focu, in cucina.

Senza fassi troppu pricurà, perchè era digià un pocu incatarritu  1, u vescu accettò, ma :
"O sgiò curatu", li disse, "ùn possu fà altri menu chè di stà, ma micca sè v'avete da dorme in pianu 2. Simu stati suldati, per Dìu santu, avemu fattu a guerra 3 è u vostru lettu serà abbastanza largu per tutt'è dui, ch'ùn simu tantu grossi."
Cusì fù detta, è Marìa, a serva, andete à cambià e lenzole è à mette torna un cuscinu inde u mentre chè i dui anziani suldati si sciaccàvanu uni pochi di ròmbuli d'uva d'un vechju caraffone 4. Eppoi, dopu avessi dettu dui Paternostri è dui Avemarìa, si n'andetenu 5 à straquassi 6 è s'addurmintonu senza èssesi scurdati di ringrazià u Signore d'esse à l'appumessu 7 quandu chì fora, avà, ùn era più acqua ma gràndina chì falava. Facìanu ancu certi toni chì parìa ch'ellu si scatinessi 8 u diàvule.
Dunque s'addurmintonu cume ciocci caldi à l'infora da e cuverte, è à l'indentru da u caraffone.
À u spuntà 9 di l'alba, trè pichjii secchi à l'usciu 10 intrònanu 11 a casa. U curatu si disceta 12 sbiguttitu 13 è, sciacchendu una sciappata 14 nant'à e cule di u sgiò vescu, mughja stizzosu 15 :
"O Marì ! Ùn sì ancu arritta ? Ùn senti micca u lattaghju chì pichja à a porta ?"